من سواليف الراوي محمد الشرهان

مرة من المرات دعيت إلى حفل وقالوا لي يا أبو خالد، وش عندك آخر الأسبوع هذا، قلت والله ما عندي شيء،
قال: نبيك تجينا في مكان ما بعيد (من ديره إلى دير)
قلت: طيب على شان؟
قال: فيه حفل مهم وترى اللي بيحضرون في الحفل شخصيات كبيرة ونبيك تشارك مع اللي مشاركين في الحفل تشارك معهم يعني بشيء من محفوظاتك ورواياتك من الشعر الشعبي، قلت: إن شاء الله خير متى تبون؟ قال: الأربعاء والخميس والجمعة تحضر عندنا،
قلت: طيب، فعلاً جهزوا لي تذكرة وكل شيء وتجهزتع قلت من هم اللي بيجون في الحفل قال يبي يجي في الحفل ناس كبارية وشخصيات وناس أهل مقامات عالية ولازم تجهز
آه يوم دريت أن الموضوع كذا قلت لازم أجيب شيء يواجه مقامهم فوالله استرجعت وحاولت أتذكر السوالف الزينه والذربه واللي شواهدها قصيد، قصيد جزل وزين خاصة من القديم لأن أنا أكثر اللي أحفظه كله من الشيء القديم،
والله وتجهزت وكل شيء وآخذ بشتى معي وأطلع للمطار وأروح الحاصل يوم إني وصلت المطار تلقاني واحد في المطار وداني أول شيء للأوتيل وقال خلك هنا الين نبي نزهمك إلا جاء مسيان الحفل يبدأ في الموقع الفلاني قلت طيب وصف لي موقع الحفل قال تغد هنا وارتح وإلا منك خلصت تجي لموقع الحفل شفه في المكان الفلاني فعلاً يوم جاء مسيان بعد صلاة المغرب والبس البشت واتزهب واجيك لموقع الحفل ويوم جيت والاهم حاطين بيت شعر كبير بيت الشعر هذا مثومن والاقدام بيت الشعر من الجهة اليمين موقفين فرس عليها دشن ومجهزه هالفرس كأنها من خيل الأولين وعلى اليسار بجنب بيت الشعر هذا بعير عليه سفايف وخروج وراكبه واحد شكله يبين كأنه مظهر حياة بادية أو شيء من التراث القديم، وصافين في بيت الشعر صحينات مثل الصياني الصغيرة بس أنها صغار عليها تمر واقط محطوط يعني كل شيء تراث قديم وفيه واحد عنده دلال،
صفة دلال رسلان وجنبه واحد معه ربابه يحميها على الضو ويرجعها ويجربها قلت هذا موقع الحفل جيت وسلمت عليهم ولقيت الشمرف على الحفل اللي قال لي تعالى وقلت بيائك شعار غيري يعني ناس معهم شعر لأني أنا من الحفاظ أنا نيب شاعر قال إيه فيه يبي يجي ناس، جاء راعي الربابة قعد يجهزها ويدوزنها ويحضرها وتحضر قال لا بعد شوي يبي يجي فيه عرضه وما عرضة قلت عجيب وناس يلعبون بالسيوف وناس لابسين مرودنات قلت بدأ الحفل لكن أطالع الجمهور هالي جايين لأنه في مكان عام وكلن يدله هالحفل ذا تقريباً يمكن الدخول أنه برسوم أو بشيء لكنه معلن عنه على أساس أنه يصير الحفل هذا كله من التراث ها وبدأ الحفل وأطالع إلا فيه ثلاثه لا ينات ثلاث صفوف صف هنا وصف هنا عريض في الوسط كراسي أول شيء كنب وبعدين كراسي عايديه ولكن الميكروفونات موزعه هنا يمين ويسار بحيث اللي يتكلم من هنا يسمعونه اللي في الجهات الثانية كلها،
يوم صلينا العشاء أطالع يوم بدو الناس يجون ويتجمعون لكن كان فيه بروفات قصايد تلقى بالمسجل وكان راعي الربابه يجربها شوي والناس هذولا يجتمعون لكن المكان فيه انضباط وفيه أمن وفيه كل شيء أطالع يوم برقت ولا والله تقريباً سبعين بالميه من الحضور أكثرهم نسوان وخاصة اللي في الصفوف الأولى عليه عجز كبار لاحظتهم أنا يعني قليل في الشابات وذا متأخرات ووراء كل مثلاً أربعة خمسة بينهم إما رجال وإلا والد وإلا شاب مثل القيم، المهم بدا الحفل يوم درينا يوم جوحقين العرضه وبدت العرضه وقاموا يلعبون بالعرضه ويهزعون وكل شيء خلصوا وجا واحد والقي له أبيات غزلية قصيدة قام راعي الربابة هذا يغني أغاني مسحوب وما مسحوب من كل شكل، الحقيقة أنا عندها جيت لرفيقي قلت له يا خوي تعال وين أنت تقول أن اللي يبي يجي أعيان وشخصيات وناس يعني كباريه هل حين ما نيب أشوف إلا نسوان هنا قدامي أكثرهم تقريباً قال إيه يا رجال ميخالف أنت لا تصير عاد مره عكر قلت وش قون: قال: أترك القصائد المطوله واللي تعلق بالتاريخ دور لنا شيء يضحك والا شي يفرفش يوسع صدورهن ولا تزود بالحيل يعني شيء خفيف ولا عليك منهم،
قلت بس يا خوي أتت قايل لي كذا وأنا اللي أنا حفظه غير مايناسب المقام ذا قال: لا لا يبي يسهل الله سكت والا أني عاني من ديره جاي لديره صعبه المسالة أقول لا بعد أطالع راعي الربابه هذا ولاه بعد مثلي يغني أغاني ما تناسب المقام ذا كل اللي هو يغنيها الحان عسره الله يفهمونها أهل الربابه وأهل القصيد الكايد الثقيل يعني مثلاً يغني صخري ومسحوب وهجيني وما أدري ويش والربع اللي حضرين يبون شيء على النغمة الخفية وعلى الرتم الخفيف خلص هذا وحطو الغاز مدير يوش قال هل حين ترى حنا نبي نقدمك قلت أجل لا تقول اسمي قل مع فقرة شعبيه وبس قال: طيب يوم أني برقت والله وطالعت وإلا أكثر الحضور مثل ما ذكر تعجز كبار الواحده ما تقوم إلا عاضه برطمها من العافية وكبار ومتفرقات يمين ويسار معهم البيبسي وهالحال وهالفيشار
قال: ترى نبي نقدمك هالحين، قلت: طيب لا تقول شيء قل مع فقرة شعبيه وبس قال طيب حطولي طاولة وحطوا عيها كاس ماء وحطوا جنبها ميكرفون جيت أنا وتقدمت قلت السلام عليكم ورحمة الله وبركاته يا أخواني ويا خالاتي أنا أبقدم لكم سالفة وقصيدة أن أعجبكم الحمد لله، وإذا ما أعجبتكم ترى ما هوب عيب لا قلتوا اذكر الله والا رح لا هلك ترى مانيب زعل قالوا يطب دام هذا علمك الساعة المباركة الله يحيك أنا الحقيقة يوم برقت وإلاها العجز الكبار السن اللي قدام وذا يعني لو يجيب مثلاً قصيدة أو سالفة فيها غزل أيي استحي أجيبها قدام هذ ولي وأنا قدامهم وجه لوجه فتحمدت من ابصاري ولقيت أن ما فيه أحسن من هالسالفة وها القصيدة قالوا سمعنا قلت الساعة المباركة هالحين يا خالاتي،
بعض كبار السن من أفراد المجتمع إلا من الله سبحانه وتعالى رزقه ووسع عليه أو مثلاً محصل له مكسب جيد في بيعه في صفقة جيدة يبيع ويشتري جعل الحلال واحد والا مثلاً شاري له أرض كبيرة ووزعها وباعها وحصل فيها خير أو مثلاً جايه ورث أو أنه جايه حلال عنده حلال واجد وهو كبير هالحين كبير كل أعماله اللي هو سواها في هالسنتين التالية ونعم صحيح أنه ساهم في مشروع المدرسة الفلانية هذا مشروع خيري و(كثر خيره) صحيح أنه ساهم في بناء المسجد الفلاني ونعم شرى لعياله سيارات (كثر خيره) و(بيض الله وجهه) طلع نسيبهم من البيت الطين اللي هو كان فيه تعبان وحطه في فليله صغيره وذفه ولابقه (بيض الله وجهة وكثر خيره)
لكن ها إلا أوفي له مده قام يخمبق ويمين ويسار وش لون؟
ها ينسى طويلة العشرة أو عيليه الأوله اللي صابرة عليه هاك الحين يوم فقره وغثاه ويون أنه هاك الحين يتمنى أنه يركب الحمار هالحين معه شبح ناظر وش طوله ينسى هالعلوم هذي كلها ويروح مثلاً ويلقى له مثلاً بنت عانس عند أهلها وإلا يطير لأحد هالدير القريبة ويجب له بنت وهو في الكبيرة راح قام على روحه تصبغ ولبس له صديريه وما أدري ويش وتزين وكل شيء واطمر وراح لحداها لدير،
همن جاب له مره بنت ما هي في سنه حطها لها في شقه وهذا صحيح أو يعني متبهج وحليل وزين لكن الا أو فاله مده وتبين عليه الأمور من ناحيتين أوشيء نسى طويله العشره أم عياله اللي صابرة عليه هاك الحين يوم أن (أنا أبيهم حتى يستانسون هذولي) وصابرة عليه يوم فقره يوم أنه فقير يوم أنه مثل ما ذكرت يتمنى يركب ونيت وهالحين معه شبح ويوم أنها كاك الحين إلا ضامه الرجال تمرط ذهبها وتقول خذ يا بو عيالي لا يضيمونك الرجال رح بعهن وتخرج وسدد اللي عليك
كل هذي الأمور نساها وحتى أم عياله اجاويد يقولون لها يا أمنا أصبري جزاك الله خير يمكن ما يستمر قالت اللي فيه ما لا فيه وتحمق عاد هي وتطلع من طورها ومسكينه الضعيفة جاها الضغط وجاها السكر وقامت ركبها توجعها وكل شيء يوجعها وعيالها مساكين يركضون بها يوم يودونها لأحد يعالجها ويوم يودونها لاحد يقرأ عليها ويوم يقولون فيك نفس ويوم بلشت الضعيفه وضايق صدرها توجس هالحره كل هالسنين هذي وفي النهاية يأخذ عليها واحد ماتسوى (على ما قال)
الحاصل لكن ربك بالمرصاد وما يغفل،
يوم أو في له مدة بعد ما جابها واستانس واليوم دلت تبلشه مامداه يتم شهر إلا وهي موذيته جب أخواني جب ذاك حط ذياك اكتب البيت باسمي أنت هالحين بديت تصخن ما ادري ويش كذا الين أنه ضعيف عاد من ها لامور ذي وقام راح أول ما هذا للصيدليات ودلا يأخذ علاج وما ادري ويش ويروح للطبيب العربي ويعطيه يوم سكر ويعطيه يوم عسل ويوم علاجات وذا لكن ما تستمر الكبير كبير ما فيه فائده عقب مده ما دروا عياله إلا يوم أنهم اتصلوا عليهم المستشفى الفلاني قالوا ترى أبوكم طايح عندنا وتعالوا الحقو على أبوكم أنه تعبان وأنه حتى براطمه يابسه وطاح دلا ما عاد يقوم إلا على لحيته من ضعف العزم
(تصدقون أقول الكلام هذا) يوم دريت تاقف وحده في الصف الثالث من ذا الحريم اللي في الصف وتاقف واقفه طولها قالت: جعله ما يقوم خله ويتلتلونها بنات جنبها يمكن بناتها اقعدي يمه عيب الحكي قالت هالرجال الحبيب هو اللي يقوله هو الصحيح (تعنيني أنا) راحوا له عياله ودلوا يعالجونه الين فتح عاد أن الأديب أو الشاعر قال في هالحادث أو في ها الموضوع بيتين من الشعر تحبون اسمعكم يا خالاتي قالوا آية أيه سمعنا أها يقول الشاعر علىمثل ذا السالفه

يا ناس محدن على الشيبان هذي يشير
اللي رزقه الولي بنعمه ضافيه

قولوا لبعض العواده يتركون الهدير
خلوه يرتاح وام عييله كافيه

أشوف من جاه تثمينه بيوم يطير
يلفي علىديره سكانها حافيه

ناس تجيب المره للعود باللي يصير
لو حالته من سنين الكبر متلافيه

وإلا لفى جاب له عذرا شناح نظير
عذرا تسود الجمال بجسمها وافيه

يقول بارك لنا في ها لغزال الصغير
ولا قول جعله مبارك جيت اللافيه

يا فلان عز الله أنك بالعذارى خبير
هذه تسود الجمال وشوفها عافيه

مير البلا إلا تجمعتوا بنوم السرير
والعود طالع تركيه لمبته طافيه

واتركيه اللي طفا ما ينو جدله سبير
ولا نشغل فيه من علاته الخافيه

مسكين يامن توهق له بوضع خطير
وراه ماارتاح والأيام متقافيه

تحياتي لكم

عربوج اشكرك على الطرح الجميل
بس والله شكلك جايب جريده كامله في ذا
ههههههاياي

المدير المساهمات : 74 تاريخ التسجيل : 05/08/2011

شكرا على الموضوع الرائع. بس صدق طويل الموضوع